دا د افغانانو د بیامېشتېدنې هڅو د همغږۍ دفتر (Coordinator for Afghans Relocation Efforts - CARE) له لارې د امریکا د بهرنیو چارو وزارت (DoS) د تخلیې او پروازونو پروسې پورې اړوند مسلو په اړه د متداولو پوښتنو یا په مکرر ډول پوښتل شويو پوښتنو (Frequently Asked Questions - FAQ) په بڼه ترتیب شوی دی. په دې لارښود کې د CARE لېږد او الوتنې مسایلو په تړاو د هغو کسانو لپاره چې په دې برخه کې له ځینو پېچلتیاوو سره مخ دي، د لا وضاحت ورکولو په موخه شته پوښتنو او اندېښنو ته معلومات وړاندې شوي. د دې لارښود معلومات له بېلابېلو سرچینو څخه د "وپوښتئ" ټیم د درک په پایله کې لیکل شوي دي، په دې توګه دا لارښود د حقوقي مشورې په توګه په پام کې مه نیسي. د افغانستان د بیامېشتېدنې د هڅو لپاره د همغږۍ دفتر (CARE) چې د امریکا د بهرنیو چارو وزارت تر څارنې لاندې فعالیت کوي، له افغانستان څخه درېیمو هېوادونو ته د خطر سره مخامخ افغانانو د ویستلو په برخه کې مهم رول لري. د CARE دفتر په ټوله کې د کډوالۍ ځانګړې ویزې (SIV)، لومړی لومړیتوب یا P-1، دویم لومړیتوب یاP-2 او درېیم لومړیتوب یاP-3 قضیو لرونکو او خطر سره مخ په شرایطو برابر افغانانو په ګډون، د متحده ایالاتو د قضیې درلودونکو په ځای پر ځای کولو او لېږدولو تمرکز کوي.
نو په دې لارښود کې به موږ له کابل څخه درېیم هېواد ته د CARE د بیامېشتېدنې او الوتنو پورې اړوند اساسي پوښتنې ځواب کړي، چې د دې اړینو معلوماتو او ملاتړ په چمتو کولو سره به خلک د بیامېشتېدنې او کډوالی په سفر کې ځواکمن کړو.
اوس د امریکا د حکومت کومه څانګه د افغانانو د انتقال مسوولیت په غاړه لري؟
د امریکا د بهرنیو چارو وزارت اوس مهال له خطر سره مخ افغانانو د ایستلو د هڅو څارنه کوي. د بهرنیو چارو په وزارت کې د افغانانو د بیامېشتېدنې هڅو د همغږۍ دفتر (Coordinator for Afghans Relocation Efforts - CARE) په نوم یوه ځانګړې څانګه جوړه شوې چې له افغانستان څخه درېیم هېواد ته د مستحقو یا پر شرایطو برابر افغانانو د لېږد بهیر اسانه او همغږي کوي. CARE له بېلابېلو دولتي ادارو، نړیوال شریکان، او غیر دولتي سازمانونو سره له نږدې کار کوي څو د هغو خلکو خوندي او اغېزمن ځای پرځای کول ډاډمن کړي چې له متحده ایالاتو سره اړیکو د لرلو یا نورو زیان منونکو شرایطو له امله په خطر کې دي.
برسېره پردې، د کورني امنیت څانګه (Department of Homeland Security - DHS) متحده ایالاتو ته د ننوتلو دمخه د افغان مهاجرینو لپاره د ویزو په پروسس کولو او د امنیتي چکونو په ترسره کولو کې مهم رول لوبوي. د بېلابېلو دولتي ادارو ترمنځ دا ګډې هڅې د متحده ایالاتو د حکومت ژمنتیا څرګندوي چې خپل بشري مسوولیتونه ادا کړي او د بحران په وخت کې اړمنو خلکو ته د بیامېشتېدنې خدمات چمتو کړي.
د امریکې لخوا د زیان منونکو افغانانو د ایستلو اوسنی بهیر څه ډول دی؟
د خطر سره مخ یا زیان منونکو افغانانو د ویستلو مسوولیت اوس د متحده ایالاتو د بهرنیو چارو په وزارت کې د افغانانو د بیامېشتېدنې د هڅو همغږي (Coordination for Afghan Relocation Efforts – CARE) په نوم د یوې ځانګړې څانګې په غاړه دی. دغه څانګه له افغانستان او کله، کله له پاکستان څخه درېیمو هېوادونو ته د وړ افغانانو د لېږد لپاره اسانتیاوې برابروي.
د CARE ټیم یا څانګه د وړ خلکو ته د غوښتنلیک سپارلو لپاره ځانګړې پروسه نه لري. مګر د اسنادو او معلوماتو لېږلو لپاره، تاسو کولی شئ د برېښنالیک له لارې دوی سره اړیکه ونیسئ، او همدارنګه دوی د معلوماتو چمتو کولو لپاره د اړیکو شمېره لري. یوځل چې د وړ یا پر شرایطو برابرو کسانو نومونه مشخص شي، د دوی نومونه د متحده ایالاتو د بهرنیو چارو وزارت د الوتنو یا ایستلو لېست کې اضافه کېږي. د یادولو وړ ده چې یوازې د متحده ایالاتو حکومت واک لري چې وړ کسان د الوتنې په لېست کې ځای پر ځای کړي. هېڅ بله رسمي یا شخصي اداره نشي کولی په لېست کې خلک شامل کړي.
د امنیتي دلایلو له مخې، د متحده ایالاتو حکومت مخکې له مخکې د ایستلو او ځای پر ځای کولو پروسې په اړه معلومات نه افشا کوي. دا پروسه په پټه خو د افغان چارواکو او د قطر د حکومت په همغږۍ ترسره کېږي او دا چارې د معلوماتو د خپرېدو د مخنیوي په خاطر ترسره کېږي. له همدې امله، د تخلیې او پروازونو پروسې په اړه معتبر معلومات یوازې د متحده ایالاتو دولتي ادارو سره شتون لري.
زه څنګه د امریکا د بهرنیو چارو وزارت د CARE څانګې سره اړیکه ونیسم؟
د خپلې قضیې په اړه د بهرنیو چارو وزارت د افغانانو د بیامېشتېدنې هڅو د همغږۍ دفتر یا CARE سره د اړیکې نیولو لپاره تاسو کولی شئ د 18338390375+ شمېرې ته زنګ ووهئ. سربیره پردې ، تاسو کولی شئ د واټساپ 16789165522+ شمېرې ته پیغامونه واستوئ خو واټساپ ته زنګ نشئ وهلی. کله چې د CARE دفتر ته زنګ ووهئ، تاسو باید د خپل هویت تصدیق کولو لپاره د خپل نوم او تخلص، د زېږون میاشت، د زېږون ورځ او د موبایل څلور آخری شمېره په لیکلو سره له اړوند کارکوونکي سره چټ یا په لیکلي بڼه خبرې کولی شئ.
ستاسو د قضیې اړوند اسنادو سپارلو لپاره، تاسو باید د دوی د CAREtravelData@state.gov برېښنالیک پتې ته واستوئ. دا مهمه ده په یاد ولرئ چې د ۲۰۲۳ کال د جنورۍ را پدې خوا یوازې اصلي غوښتونکي (Principle Applicant) ته اجازه ورکول کېږي څو د قضیې په اړه د CARE اړیکو مرکز سره خبرې وکړي. برسېره پردې، د اړیکو مرکز کارکوونکي داسې روزل شوي نه دي چې د وکیلانو یا نورو استازو ته معلومات ورکړي.
د معلوماتو ترلاسه کولو لپاره د CARE د اړیکو مرکز سره اړیکه ونیسئ، د خپلې قضیې په اړه د مرستې غوښتنه وکړئ او ډاډ ترلاسه کړئ چې تاسو د احتمالي الوتنې لپاره اړین معلومات او اسناد لېږلي دي.
څوک اوس مهال د CARE له لارې د متحده ایالاتو د حکومت د الوتنو د لېست او ځای پرځای کولو (Relocation) لپاره پر شرایطو برابر دی؟
اوس مهال، د غوښتونکو لاندې ډلې د متحده ایالاتو د حکومت د CARE د بیامېشتېدنې پروسې له لارې د ځای پر ځای کېدو مرستې لپاره پر شرایطو برابر یا وړ دي:
- د کډوالۍ ځانګړې ویزې قضیه لرونکی چې اسناد یې د NVC سره بشپړ (Documentarily Completed) شوي او د مرکې په مرحله کې دي (SIV Interview Ready)؛
- هغه خلک چې د کډوالۍ ځانګړې ویزه یې صادره شوې وي (SIV Issued)؛
- د ماموریت مشرد تاییدي (COM Approval) لرونکي د وتلو پروګرام لپاره وړ دي خو باید انتظار وکړي څو چې د دوی قضیه د مرکې مرحلې ته ورسېږي؛
- په امریکا کې د پناه غوښتونکو د کورنۍ غړي د وتلو په بهیر کې وړ دي؛
- د لومړي لومړیتوب (P-1)، دویم لومړیتوب (P-2) او درېیم لومړیتوب (P-3) قضیه لرونکي چې له جدي خطر سره مخ دي، د اړوندو ادارو او سازمانونو په همکارۍ او د متحده ایالاتو د بهرنیو چارو وزارت په منظورۍ درېیمو هېوادونو ته د ویستلو الوتنې لپاره مشخص کېږي؛
- د متحده ایالاتو اتباع (US Citizen - AMCIT)؛
- د دایمي او قانوني استوګنې خاوندان (LPR)؛
- د متحده ایالاتو د اتباعو (AMCIT) د کورنۍ غړي وړ دي خو د AMCIT لرونکي باید د خپلو خپلوانو د ځای پر ځای کولو ګړندي کولو لپاره افغانستان ته راستانه نشي.
- د متحده ایالاتو د قانوني دایمي اوسېدونکو د کورنۍ غړي (LPR) وړ دي، خو LPRs باید د خپلو خپلوانو د ځای پر ځای کولو ګړندي کولو لپاره افغانستان ته راستانه نشي؛ او
- د هغو کسانو د کورنۍ غړي هم وړ دي چې د بشردوستانه ویزو په کارولو سره متحده ایالاتو ته داخل شوي (QAW Parolee family members).
د SIV قضیې د اسنادو له بشپړولو وروسته، زه باید د CARE لخوا په برېښنالیک کې پوښتل شوي 12 پوښتنو ته څنګه ځواب ووایم؟
د CARE برېښنالیک غوښتنې ته په اغېزمنه توګه ځواب ویلو لپاره، ډاډ ترلاسه کړئ چې لاندې پوښتنو ته ستاسو ځوابونه دقیق او جامع دي:
- Please list the SIV/KBL/IV Number for the primary applicant requesting relocation assistance? د دې پوښتنې په ځواب کې خپل د SIV د قضیې شمېره لکه KBL نمبر په سمه توګه ولیکئ کوم چې د NVC لخوا ستاسو د قضیه پېژندنې لپاره چمتو شوی.
2. Are you currently staying in Afghanistan or Pakistan? خپل ځای مشخص کړئ چې ایا تاسو په افغانستان کې یاست یا پاکستان کې.
3. If not, what country are you in? خپل اوسنی موقعیت مشخص کړئ.
4. What city or province are you currently in? د هغه ولایت نوم ولیکئ چېرې چې تاسو اوس اوسېږئ.
5. What is your preferred language? نوروو اړیکو لپاره د خپلې خوښې ژبه غوره کړئ لکه انګلیسي، پښتو یا دري.
6. Do you or anyone in your party have visas to another country? که تاسو د بل هېواد ویزه لرئ، په "Yes"سره ځواب ورکړئ. که نه نو په "No" ځواب کړئ.
7. Do you have a spouse or any unmarried children under the age of 21 that are with you? ځواب مو باید "Yes" وی که تاسو د کورنۍ نږدې غړي سره سره په ګډه سفر کوئ. که نه نو په "No" ځواب کړئ.
8. Do you intend to leave Afghanistan or Pakistan with just your eligible family members? دلته د "Yes"په ځواب ورکولو سره دا په ګوته کړئ چې ایا تاسو د کورنۍ د وړ غړو سره د وتلو پلان لرئ. که نه نو په "No" ځواب کړئ.
9. What is the best local phone number to reach you? د خپل موبایل شمېره چمتو کړئ څو وروسته CARE وکولی شي تاسو ته په بېړني حالت کې زنګ ووهي.
10. Do you have any medical conditions or special considerations that would affect your travel? کوم روغتیایي وضعیت چې لرئ یا ځانګړی پاملرنی ته اړتیا لرئ دلته بیان کړئ. که تاسو سم یاست، په "Yes" او کومه روغتیايي ستونزه نه لرئ په "No" ځواب ورکړئ.
11. If you answered 'Yes' to the question above, what are the medical conditions or special considerations? کوم روغتیایي وضعیت چې لرئ یا کومې ځانګړې درملنې ته اړتیا لرئ دلته یې په ګوته کړئ.
12. Are any eligible family members currently without a passport? په "No" ځواب ورکړئ که چېرې د کورنۍ ټول غړي پاسپورټونه ولري. که تاسو یا د کورنۍ کوم غړی مو پاسپورټ نه لري بیا نو په "Yes"ځواب ورکړئ.
دا ممکن د ځینو لپاره ۱۲ او د نورو لپاره ۱۰ پوښتنې وي. ډاډ ترلاسه کړئ چې ستاسو ځوابونه روښانه، لنډ او دقیق دي ترڅو په اغېزمنه توګه د لېږد بهیر اسانه کړي. په سمدستي توګه د غوښتل شوي معلوماتو چمتو کول کولی شي د CARE سره ستاسو د وضعیت ارزولو کې مرسته وکړي او د اړتیا په صورت کې د ځای پرځای کولو (Relocation) پروسې لپاره ګامونه پورته کړي.
CARE په کوم اساس د متحده ایالاتو قضیه لرونکي درېیم هېواد ته لېږدوي؟
د CARE لېږد لپاره معیارونه په رسمي توګه غوښتونکو یا خلکو ته نه دي واضح شوي. د الوتنو او ځای په ځای کولو پرېکړې د امریکې د لومړیتوبونو پراساس دي او لاهم بېلابېل ناڅرګند عوامل شتون لري چې یوازې NVC او د متحده ایالاتو د بهرنیو چارو وزارت ته روښانه دي. په دې کې په سلګونو عوامل شامل دي، خو ځینې پېژندل شوي فکټورونه چې په دې لېږد او پروازونو اغیزه کوي په لاندې برخه کې لېست شوي دي:
- غوښتونکی د متحده ایالاتو د کډوالۍ قضیه، د بېلګې په توګه د SIV، P-1، P-2، P-3 یا... قضیه لري؛
- د متحده ایالاتو په اړوندو دولتي سازمانونو او د CARE دفتر کې په بریالي توګه د اداري پروسې (Administrative process) د بشپړېدو نېټه؛
- هغه غوښتونکي یا اشخاص چې هغو ته د متحده ایالاتو د بهرنیو چارو وزارت (DoS) او د ویزې ملي مرکز لخوا د ویزې صادرولو لپاره د دوی د داخلي اصولو سره سم لومړیتوب ورکول کېږي، دا لومړیتوب په رسمي ډول نه دی افشا شوی؛
- لومړی یا لوړ لومړیتوب کټګورۍ معمولاً هغو اشخاصو ته ورکول کېږي چې په مستقیم ډول د متحده ایالاتو بنسټونو سره کار کړی وي، لکه د متحده ایالاتو سفارت یا د ژباړونکي په توګه له ایساف او ناتو سره کار کړی وي؛
- د کورنۍ د غړو د بیایوځای کېدو قضیې هم کېدی شي پورته لومړیتوب ورکړل شي؛
- هغه غوښتونکي چې په امریکایي شرکتونو کې د کار کولو له لارې د دې هېواد له نظامي سکټورونو سره په مستقیمه توګه مرسته کړي معمولاً په منځني لومړیتوب کټګورۍ کې ځای پر ځای کېږي.
- هغه خلک چې د سیمه ایزو شرکتونو لپاره د فرعي قراردادیانو په توګه کار کوي په عمومي توګه د ټیټ لومړیتوب کټګورۍ کې ځای پرځای شوي؛
- د دفترونو، شرکتونو، څارونکو (Supervisors) او لوړ پوړو چارواکو لخوا د غوښتونکو راجع کول چې د بهرنیو چارو وزارت لخوا د تخلیې لپاره تایید شوي وي، هم مهم رول لوبوي.
- بیا، د لومړي یا مهم لومړیتوب، منځني لومړیتوب او ټیټ لومړیتوب د کټګوریو له مخې، د CARE ټیم د قضیې د لومړیتوب نېټې (Priority date) او د اسنادو بشپړېدو (Documentarily completed) ته په کتو د اړوند کټګورۍ په پام کې نیولو سره غوښتونکي لېږدوي؛
- د اړونده قونسلګرۍ او NVC همغږي، د اسنادو د پروسس سرعت، د صادرولو لپاره د مطلوبې ویزې شتون، د روغتیایي ازموینو پایلې، د اړوند کمپ حالت، د مسافرینو لپاره د الوتکې ظرفیت، د امریکې په غوره شوي ایالت کې د بیامېشتېدنې د فرصت شتون او دې ته ورته نور مسایل د CARE پر بیامېشتېدنې اغېز لري.
دا مهمه ده په یاد ولرئ چې دا فکټورونه د ځای پر ځای کېدو په اړه یو وړوکی تصویر وړاندې کوي، ممکن په سلګونو نور فکټورونه او عوامل وي چې د CARE د تخلیې او پروازونو پروسه کې اغېز لري.
که چېرې د CARE ټیم زما د اسنادو غوښتنه نه وي کړې او زه یې پخپله ولېږم، څه پېښېږي؟
که تاسو خپل ځان په داسې حالت کې ومومئ چېرې چې د CARE ټیم ستاسو د اسنادو غوښتنه نه ده کړې، نو دا مهمه ده چې فعال ګامونه پورته کړئ څو ډاډ ترلاسه شي چې ستاسو قضیه په سمه توګه پرمخ ځي. خپل پاسپورټ او نور اړین اسناد په مستقیم ډول CARE ته لېږلو سره، تاسو کولی شئ د پروسې په چټکتیا کې د دوی سره مرسته وکړئ. دا فعاله طریقه د CARE دفتر سره مرسته کوي چې ستاسو اړین اسناد د دوی معلوماتو ډیټابیس ته پورته کړي او ستاسو د الوتنې اړتیاوې ساده او بشپړ کړي.
دا مهمه ده په یاد ولرئ چې که څه هم د اسنادو سپارل کولی شي پروسه اسانه کړي، خو ستاسو قضیه نه هم ګړندۍ کوي او نه ځنډوي. د CARE ټیم به بیا هم د غوښتنو پروسس کولو لپاره خپل معیاري پروسه تعقیب کړي. په هرصورت، ستاسو د اسنادو چمتو کولو لپاره نوښت دا یقیني کوي چې ستاسو معلومات د چارواکو لخوا د بیاکتنې لپاره په اسانۍ سره شتون لري.
په هغو قضیو کې چې CARE تاسو سره اړیکه نه وي نیولې، ټلیفون کول او د اسنادو لېږل ستاسو د قضیې په بشپړولو کې مرسته کولی شي. دا اسناد د CARE لپاره خورا مهم دي څو د احتمالي ځای پرځای (Relocation) کولو فرصتونو لپاره چمتووالی ونیسي که چېرې د متحده ایالاتو حکومت اجازه ورکړي. د CARE سره په فعاله توګه په اړیکه پاتې کېدو سره، تاسو د پروسې سره مرسته کوئ او د ځای پرځای کولو اختیارونو کارولو ته خپله لېوالتیا ښکاره کوئ.
د ځای پر ځای کولو په موخه د CARE د اړیکې نیولو او د الوتنې مهالوېش تر مینځ څومره وخت دی؟
د هغو خلکو لپاره چې د بیامېشتېدنې په تمه دي د CARE د الوتنې مهالوېش پروسه د پام وړ توپیر کولی شي، او دا د ډېری فکټورونو لخوا اغېزمن کېږي. د ښکیلو مسایلو د پېچلتیا له امله، کوم ځانګړی اوسط مهال وېش شتون نه لري. د الوتنې مهالوېش په فکټورونو پورې اړه لري لکه په قطر کې د CAS کمپ په ګډون د متحده ایالاتو د پناه غوښتونکو په کمپونو کې د پروسس سرچینو شتون او همدارنګه د غوښتونکي انفرادي شرایط.
ډېری فاکټورونه لکه د مسافرینو لپاره د الوتکې اندازه، د روغتیایي ازموینې پایلې، د امنیتي چکونو پایلې او نور لوژستیکي ملاحظات د الوتنې پلان کولو پروسه اغیزه کوي. په دې توګه، تاسو باید په افغانستان کې د نامعلومې مودې پاتې کېدو لپاره چمتووالی ونیسئ څو یوازې د نامعلومې الوتنې د احتمال پراساس د ژوند پرېکړې کولو څخه ډډه وکړئ.
په داسې حال کې چې هېڅ کره مهال وېش شتون نه لري، دا معمولاً د CARE لخوا د لومړني تماس څخه تر اصلي الوتنې پورې له ۳ څخه تر ۱۵ میاشتو پورې یا حتی ډېر وخت نیسي. د CARE لخوا د دویم کال څخه وروسته تر ممکنه الوتنې پورې، د وخت موده د 15 څخه تر 90 ورځو پورې توپیر لري، او ځینې وختونه ممکن یو شخص تر شپږو میاشتو پورې انتقال نشي. په هرصورت، دا مهمه ده یادونه وکړو چې دا اټکلونه نږدې دي او د مختلفو فکټورونو پر بنسټ د بدلون تابع دي. هغه خلک چې د بیامېشتېدنې په تمه دي باید د سفر لپاره انعطاف او چمتووالی وساتي او د خپل د الوتنې حالت څخه خبر وي.
ولې د CARE د لېږد بهیر دومره وخت نیسي؟
د متحده ایالاتو د SIV، P-1، P-2،P-3 او د کډوالۍ بېلابېلو قضیو د غوښتونکي د ځای پر ځای کولو پروسه د CIA، FBI، د کورني امنیت ډیپارټمنټ، د دفاع وزارت او نورو په ګډون د ډېرو فدرالي او اړوندو امنیتي ادارو له ادارې پروسې او امنیتي تصفیې څخه تېرېږي او هره اداره ځان ته خپل سېسټمونه او اداري پروسې لري. دا پېچلتیا تر ډېره د الوتنې د پروسې پر ځنډ اغېزه کوي. د متحده ایالاتو حکومت دا ننګونې پېژني او په فعاله توګه کار کوي څو د لېږد د غوښتونکي اداري پروسې ساده کړي.
هڅې روانې دي څو ډاډ ترلاسه شي چې اړوندې ادارې قضیې په سمه او اغېزمنه توګه پروسس کوي او غیرضروري ځنډونه کموي. د پروسو ساده کول، د اړوندو بنسټونو او سازمانونو ترمنځ د همغږۍ ښه کول، او د ټېکنالوژۍ پر بنسټ د حل لارو پلي کول ځینې ستراتیژۍ دي چې موخه یې د لېږد بهیر ګړندی کول دي.
برسېره پردې، د کډوالۍ د قضیو د بیاکتنې بشپړ بهیر، په ځانګړې توګه هغه چې حساس امنیتي ملحوظات پکې شامل دي، د ځای پر ځای کولو پروسه کې د وخت ضایع کولو سره مرسته کوي. هره قضیه کره ارزونې ته اړتیا لري څو د معلوماتو دقت او بشپړتیا تصدیق کړي او د سخت امنیتي پروتوکولونو اطاعت یقیني کړي.
ما په دې وروستیو کې له CARE/IOM څخه د U.S. Tie او DS-5535 فورمې ترلاسه کړي دي؛ دا څه معنی ورکوي؟
د U.S. Tie (په امریکا کې د شخص سره اړیکه) او DS-5535 فورمې ترلاسه کول په دې معنی ده چې د متحده ایالاتو د بهرنیو چارو وزارت په فعاله توګه ستاسو قضیه درېیم هېواد ته د انتقالولو لپاره پروسس کوي. د DS-5535 فورمه د اضافي معلوماتو په راټولولو او د DS-260 فورمه کې چمتو شوي توضیحاتو بشپړولو له لارې د اداري پروسې (Administrative process) ساده کول دي. که قونسل یا افسر د مرکې وروسته د یادې فورمې غوښتنه وکړي، تاسو به لا دمخه دا اړتیا پوره کړې وي او په بالقوه توګه د ویزې ټول بهیر او د صادرولو وخت ګړندی کړئ.
د U.S. Tie فورمې په ډکولو سره د کډوالۍ نړیوال سازمان (IOM) ته په متحده ایالاتو کې د ژوند کولو لپاره د خپل ټاکل شوي ایالت یا ښار په اړه خبر ورکوئ. دا به په هغه ایالت کې د اړونده بیامېشتېدنې ادارو او چارواکو سره همغږي اسانه کړي او ډاډ ترلاسه کړي چې اړوند ایالت ته ستاسو د ژوند لپاره ترتیبات نیول شوي.
دا مهمه ده پوه شئ چې د دې فورمو ترلاسه کول درېیم هېواد ته ستاسو سمدستي ځای په ځای کېدو تضمین نه کوي. بلکه، دا په ګوته کوي چې دا تاسو درېیم هېواد ته د احتمالي الوتنې لپاره لېست کې اچوي. په داسې حال کې چې ځینې خلک ممکن د دې فورمو د بشپړولو څخه وروسته له 2-3 میاشتو په موده کې الوتنه وکړي، هره قضیه خپل شرایط لري او د هرې قضیې وخت توپیر لري. له همدې امله، دا غوره ده چې د خپلې قضیې وضعیت د نورو سره پرتله نه کړئ، ځکه هغه عوامل چې د قضیې په لېږد اغیزه کوي له یوې قضیې څخه بلې قضیې پورې توپیر لري.
ولې ما د متحده ایالاتو U.S Tie او DS-5535 فورمې نه دي ترلاسه کړي، خو نورو ته استول شوی دی؟
که چېرې تاسو د U.S. Tie (په متحده ایالاتو کې د اړیکې کس) او DS-5535 فورمې نه وي ترلاسه کړي، دا په ګوته کوي چې CARE اوس مهال درېیم هېواد ته ستاسو پر لېږد او د اسنادو پروسس کولو باندې کار نه کوي. دا معمولاً پدې معنی ده چې د بهرنیو چارو وزارت لا تر اوسه CARE ته امر نه دی کړی چې تاسو بل هېواد ته ولېږدوي. اوس د CARE ټیم د بهرنیو چارو وزارت لخوا راجع شوي خلکو ځای په ځای کولو باندې کار کوي ، له دوی سره اړیکه نیسي او له دوی څخه د U.S. Tie او DS-5535 فورمو د ډکولو غوښتنه کوي.
له هغه وخته چې د بهرنیو چارو وزارت د بیامېشتېدنې په پروسه کې د موثریت او اغیزمنتوب لپاره د پام وړ پرمختګونه شوي، په عموم ډول، هغه کسان چې د څو میاشتو څخه تر شاوخوا یو کال پورې د مرکې لپاره انتظار باسي د الوتنې په لېست کې شامل شوي او له هغو غوښتنه شوې چې دا فورمې ډکې کړي. دا قضیې ډېر باوري دي ځکه چې دوی د یوې سخت اداري پروسې (Administrative process) څخه تېر شوي دي.
په هرصورت، د هغو قضیو لپاره چې د یو کال څخه زیات د مرکې لپاره انتظار باسي، ممکن د دوی د اسنادو د اعتبار په اړه اندېښنې شتون ولري. ځینې غوښتونکو ممکن د 2021 په اوږدو کې جعلي یا غیر معتبر اسناد وړاندې کړي وي چې د بهرنیو چارو وزارت د شک لامل شوي. د پایلې په توګه، د اوږدې انتظار سره سره، ځینې قضیې رد شوي، هغه قضیې چې شکونه یا جعلي اسناد لري هم به هم رد شي. په هرصورت، هغه قضیې چې د یو کال څخه ډېر وخت لپاره درېیم هېواد ته د مرکې او الوتنې لپاره انتظار باسي، په بریالیتوب سره د اداري پروسې (Administrative process) له بشپړېدو وروسته به د مرکې او الوتنې لپاره پر شرایطو برابر وي. که ستاسو قضیه په دې کټګورۍ کې راشي، نو کله چې اداري پروسې بشپړې شي د بهرنیو چارو وزارت او NVC به ستاسو بیامېشتېدنه اسانه کړي او ستاسو قضیه به وړ وي. په دې وخت کې، CARE او احتمالاً IOM به له تاسو څخه وغواړي چې د U.S. Tie او DS-5535 فورمې ډکې او وسپاري.
ایا U.S. Tie او د متحده ایالاتو د یو ځانګړي ایالت غوره د CAREلخوا زما د قضیې پر پروسس او ځای پر ځای کېدو اغېزه کوي؟
هو! د متحده ایالاتو د اړیکې کس (U.S. Tie) او د بیامېشتېدنې لپاره د ځانګړو ایالتونو لکه کالیفورنیا یا ویرجینیا غوره کول ممکن ستاسو د قضیې پروسس او د CARE د ځای پر ځای کولو پر مهال وېش اغېزه وکړي. په دې ایالتونو کې د بیامېشتېدنې غوره کول ممکن ستاسو د ځای پر ځای کولو پروسه وځنډوي. دا ځنډ رامنځ ته کېږي ځکه چې مناسب کورونه چې د متحده ایالاتو حکومت او د کډوالۍ نړیوال سازمان (IOM) پالیسیو سره سمون لري په دې سیمو کې ممکن په اسانۍ سره شتون و نه لري یا ارزانه نه وي. برسېره پر دې، ځینې ایالتونه ممکن د کډوالو د بیامېشتېدنې په اړه محدودیتونه ولري.
د یادولو وړ ده چې CARE او د بیامېشتېدنې نورې اړوندې ادارې د شته سرچینو او پالیسیو په چوکاټ کې کار کوي چې د متحده ایالاتو د حکومت او نړیوالو سازمانونو لخوا ټاکل شوي. له همدې امله، د داسې ایالتونو غوره کول چېرې چې د استوګنې او کډوالۍ ګټې په اسانۍ سره شتون لري او د اړوندو پالیسیو سره سمون لري کولی شي د ځای پرځای کولو پروسه اسانه کړي. IOM د ویزې ملي مرکز (NVC) او CARE سره په ځانګړو ایالتونو کې د غوښتونکو لپاره د استوګنې او پناه غوښتنې ګټو او فرصتونو د شتون په اړه اړیکه نیسي، چې د ځای پر ځای کولو ډېر اغېزمن ترتیبات ورته ونیول شي.
د هغو ایالتونو په غوره کولو سره چېرې چې کورونه او سرچینې په اسانۍ سره شتون لري او چېرې چې تاسو په متحده ایالاتو کې د یو چا سره اړیکه لرئ، تاسو کولی شئ په بالقوه توګه د CARE لخوا د خپلې قضیې پروسس او ځای پرځای کول ګړندۍ کړئ او یو درېیم هېواد او بیا متحده ایالاتو ته د اسانه لېږد تجربه کړئ.
زه په متحده ایالاتو کې د اړیکې کس (U.S. Tie) نه لرم، نو زه باید د متحده ایالاتو د تړون په اړه د CARE یا IOM برېښنالیک ته څنګه ځواب ورکړم؟
که تاسو په متحده ایالاتو کې د اړیکې کس (U.S. Tie) نه لرئ، تاسو کولی شئ بیا هم د U.S. Tie فورم په اړه د CARE یا IOM برېښنالیک ته ځواب ووایاست. په برېښنالیک کې د فورم ډکولو لپاره لارښوونې چمتو شوي، حتی که تاسو په شخصي توګه په متحده ایالاتو کې څوک نه پېژنئ. تاسو کولی شئ هغه ښار او ایالت وټاکئ چېرې چې تاسو غواړئ ژوند وکړئ او که چېرې کوم مشخص کس شتون نه لري، تاسو کولی شئ په نورو اختیارونو برخه کې "N/A" ولیکئ او یو لنډ یادداشت چمتو کړئ چې تاسو د U.S. Tie نشتوالي سره سره په اړوند ایالت کې ژوند کول غوره کوئ.
دا مهمه ده په یاد ولرئ چې د ځینې ایالتونو غوره کول لکه کالیفورنیا یا ویرجینیا ممکن اغېزې ولري او سپارښتنه کېږي چې تاسو دا ایالتونه غوره نه کړئ پرته له دې چې تاسو د کورنۍ نږدې غړي هلته ژوند کوئ.
مهرباني وکړئ په یاد ولرئ که تاسو د U.S. Tie نه لرئ، په ډېرو مواردو کې به IOM پخپله پرېکړه وکړي چې آیا تاسو په یو ځانګړي ایالت کې د بېلابېلو اړخونه په پام کې نیولو سره ځای پرځای کړي. همدارنګه، که تاسو په متحده ایالاتو کې هېڅ اړیکه نلرئ یا که ستاسو اړیکې محدودې وي، تاسو ممکن آزاده قضیه وګڼل شئ. په داسې حالاتو کې، د بیامېشتېدنې ادارې به ستاسو د ملاتړ لپاره د دوی د شرایطو پر بنسټ ستاسو ایالت وټاکي.
ایا NVC زما د ۲۱ کالو څخه پورته د کورنۍ غړي معلومات له CARE سره شریک کړي؟
که تاسو د DS-260 فورمه ډکه کړې وي، نو NVC به ستاسو د کورنۍ د غړو لېست د هغو د عمر په پام کې نیولو پرته د CARE ټیم سره شریک کړي. په هرصورت، ستاسو د کورنۍ غړي عمر د درېیم هېواد لکه قطر، آلمان یا البانیا ته د تګ لپاره د دوی د شرایطو په برابروالي کې خورا مهم دی. که تاسو د ۲۰۲۲ کال د جولای له ۲۰مې دمخه د ماموریت له مشر څخهCOM Approval ترلاسه کړی وي، د عمر محاسبه د DS-360 فورمې پر بنسټ ده او د کورنۍ غړي باید د یادې فورمې د فایل کولو په وخت کې له ۲۱ کلونو څخه کم وي څو د ځای پر ځای کېدو لپاره وړ وي.
له بلې خوا، که تاسو د ۲۰۲۲ کال د جولای له ۲۰مې څخه وروسته د ماموریت له مشر څخه COM Approval ترلاسه کړی وي او دا چې اوس د DS-360 فورمه لیرې شوې، نو د عمر محاسبه د DS-157 فورمې پر بنسټ کېږي. د کورنۍ غړي باید د ۲۱ کلونو څخه کم عمر ولري کله چې دوی د متحده ایالاتو ویزې وړ کېدو لپاره د DS-157 فورمه ډکه کړي. په هرصورت، دا مهمه ده یادونه وکړو چې سفارتونه د ماشومانو د ساتنې حالت قانون (CSPA) پلي کوي، کوم چې ممکن د وړتیا معیارونه اغېزمن کړي. په نهایت کې د قونسلګرۍ افسر چې مرکه ترسره کوي د کورنۍ د غړو د ویزې شرایطو په اړه وروستۍ پرېکړه کوي. دا باید په یاد وساتل شي چې درېیم هېواد ته د لېږد لپاره د CARE ټیم په قضیو کې د کورنۍ د غړو د عمر محاسبه د DS-260 فورم د سپارلو نېټې پر بنسټ ترسره کوي.
که ستاسو د کورنۍ غړي د وړتیا معیارونه پوره کړي او د CARE ټیم لخوا په قطر او آلمان کې لنډمهاله هستوګنې یا البانیا کې هوټلونو ته لېږدول شوي وي، تر هغه چې د دوی اسناد پروسس کېږي، دوی به هلته وي او بیا کولی شي ستاسو سره یوځای شي.
ولې CARE زما د کورنۍ غړی چې د ۲۱ څخه پورته ده که څه هم دا زما په قضیه کې شامل دی، د الوتنې په لېست کې نه نیسي او نه یې انتقالوي؟
د ۲۱ کالو څخه پورته د کورنۍ غړي د ځای پر ځای کولو پرېکړه د CARE د اداري لارښودونو او د مرکه کوونکي قونسلګرۍ افسر لخوا اغېزمن کېږي. په داسې حال کې چې د NVC لارښودونو کې د عمر له پام کې نیولو پرته د کورنۍ ټول غړي شامل دي، خو CARE ته د بهرنیو چارو وزارت لخوا د سپارل شوي لارښودونو پر بنسټ، کېدی شي په دې برخه کې د CAREلخوا ځینې محدودیتونه ولګول شي.
CARE ممکن د مرکې پروسې په جریان کې د قونسلګرۍ افسر لخوا د احتمالي رد کېدو په اړه د اندېښنو له امله د ۲۱ کالو څخه د پورته ماشومانو د ځای پر ځای کولو څخه انکار کوي. برسېره پردې، که چیرې دا کس ته ویزه ورنکړل شي بیانو CARE لپاره ممکن مالي اغېزې ولري. په داسې حالاتو کې کورنۍ کولی شي خپله قضیه بل سفارت ته لکه په پاکستان کې د امریکا سفارت ته د نورو پروسس لپاره انتقال کړي.
دا باید په یاد وساتل شي چې درېیم هېواد ته د لېږد لپاره د CARE ټیم په قضیو کې د کورنۍ د غړو د عمر محاسبه د DS-260 فورم د سپارلو نېټې پر بنسټ ترسره کوي. په نهایت کې، CARE خپلو لارښودونو باندې عمل کوي په داسې حال کې چې NVC خپل لارښوونې تعقیبوي. د کورنیو لپاره دا مهمه ده چې په هغه فکټورونو پوه شي چې د ۲۱ کالو څخه پورته د خلکو ځای پر ځای کولو باندې اغېزه کوي او که اړتیا وي، د خپلې قضیې پروسس کولو لپاره بدیل غوراوي په پام کې ونیسي.
متحده ایالاتو ته د امیندوارۍ او نوې زېږدلې ماشوم د سفر په برخه کې د IOM محدودیتونه څه دي؟
متحده ایالاتو ته د امیندوارۍ او نوې زېږدلې ماشوم د سفر په برخه کې د IOM لارښوونې روښانه دي. د IOM د پالیسۍ له مخې، امېندواره مېرمنې باید د لومړي وار امېندوارۍ 35 اونیو ته رسېدو دمخه یا د دویم ځل او تر دې پورته وار امیندوارۍ لپاره 33 اونۍ څخه وړاندې سفر وکړي. په هرصورت، دا مهمه ده په یاد ولرئ چې هر هوایی شرکت ممکن خپلې لارښوونې ولري، او که کوم د هوایی شرکت اړتیاوې د IOM سره توپیر ولري، د هوایی شرکت مقررات لومړیتوب لري.
ماشومان معمولاً له زېږون څخه دوه اونۍ وروسته سفر کولو لپاره په طبي ډول آماده دي. په هرصورت، د مهاجرت ویزې (IV)، د کډوالۍ ځانګړې ویزې (SIV) یا د کډوالۍ نورو قضیو کې د ماشوم اضافه کولو پروسه نږدې دوه اونۍ څخه تر یوې میاشتې پورې وخت نیسي. په دې کې د استوګنې اسناد، د کډوالۍ اسناد او نور اړین اسناد شامل دي. له همدې امله، سپارښتنه کېږي چې د ماشوم له زېږون وروسته سمدستي د ویزې ملي مرکز (NVC) او CARE سره اړیکه ونیسئ څو خپله قضیه کې د ماشوم د اضافه کولو پروسه پیل کړئ.
دا د هغو خلکو لپاره اړینه ده چې امېندواره وي یا په دې وروستیو کې زېږېدلی وي چې ژر تر ژره د اړوندو چارواکو سره اړیکه ونیسي او د هغوی لارښوونې تعقیب کړي څو ستاسو او ستاسو د ماشوم لپاره د خوندي سفر تجربه یقیني کړي.
له کابل څخه درېیم هېواد ته د CARE یا IOM د بیامېشتېدنې الوتنو کې د امېندوارۍ اعظمي موده څومره ده؟
د امېندواره مېرمنو د خوندیتوب او هوساینې لپاره، د امیندوارۍ اعظمي موده د CARE یا IOM لیږدونې الوتنو کې معمولاً د امېندوارۍ تر 30 اونیو پورې محدود وي. په هرصورت، په ځینو مواردو کې، دا موده ممکن د 28 یا 29 اونیو څخه مخکې محدوده وي. دا احتیاطي تدابیر نیول شوي ځکه چې د هوا په فشار کې د بدلونونو په ګډون د الوتنې شرایط، د امېندوارو مسافرینو لپاره خطرونه رامینځته کولی شي.
دا د امېندواره مېرمنو و لپاره خورا مهم دی چې د ځای په ځای کولو پروسې په جریان کې د دوی د امېندوارۍ وضعیت په اړه صادق وي، ځکه چې د دوی روغتیا او خوندیتوب خورا مهمه ده. برسېره پردې، په کابل کې د بیا ځای پر ځای کولو پروسې د یوې برخې په توګه ترسره شوي روغتیایی معاینات په سمه توګه د امېندوارۍ وخت ټاکي او ډاډ ترلاسه کوي چې مناسب تدابیر او سمونونه ترسره شوي.
د یو اسانه او خوندي ځای پرځای کولو تجربې څخه د ډاډ ترلاسه کولو لپاره، امېندواره خلک باید د CARE یا IOM لخوا چمتو شوي لارښوونو ته غاړه کېږدي او د هر ډول روغتیا اندېښنې یا شرایطو سمدستي اړوندو چارواکو ته راپور ورکړي.
زما د روغتیايي معایناتو پایله چې په کابل کې د CARE په همغږۍ ترسره شوي، چېرته لېږل کېږي؟
هغه روغتیایی ازموینه چې په کابل کې د CARE په همغږۍ ترسره شي، اړوندو سفارتونو ته لېږل کېږي چېرې چې غوښتونکی به خپله مرکه ترسره کوي. په کابل کې په روغتیايي معایناتو کې د ایکسرې، د وینې معاینات او د ادرار معاینات شامل دي چې په درېیم هېواد کې د نورو طبي معایناتو اړتیا له منځه وړي. دا د ځای پر ځای کولو پروسې ګړندي کولو کې مرسته کوي او په درېیم هېواد کې د غیرضروري ځنډ مخه نیسي.
د مرکې وروسته، د آلمان، قطر او البانیا په څېر هېوادونو کې پروسس شوي قضیې په چټکۍ سره پرمختګ کوي او ډېری غوښتونکي د درېیو اونیو په اوږدو کې خپلې ویزې ترلاسه کوي. اداري پروسې چې دمخه د NVC لخوا ترسره شوي په دې اغېزمن مهال وېش کې مرسته کوي.
آیا خلک کولای شي چې له سفر وړاندې په له کابل کې د خپلو روغتیايي معایناتو پایلو ته لاسرسی ولري؟
هو! غوښتونکي حق لري چې په کابل کې تر سفر وړاندې د خپلو روغتیايي معایناتو پایلو ته لاسرسی ولري. غوښتونکي باید د خپلو روغتیایی ازموینو پایلې په مستقیم ډول له اړوند روغتیایی کلینیک څخه وغواړي چېرې چې ازموینې ترسره شوي. CARE کلینیک ته لارښوونه کړې چې غوښتونکو ته له غوښتنې سره سم د روغتیا ازموینې پایلې چمتو کړي. په هرصورت، دا مهمه ده په یاد ولرئ چې کلینیک ممکن په خپله د غوښتونکي له غوښتنې پرته پایلې تاسو ته ورنکړي.
که غوښتونکی د خپلو روغتیایی پایلو غوښتنه وکړي او د دوی غوښتنې سره، سره یې له کلینیک څخه ترلاسه نه کړي، دوی باید دا د CARE اړوند استازي ته راپور کړي. کله چې راپور ورکوئ، اړینه ده چې توضیحات ذکر کړئ لکه د غوښتونکي نوم، د زېږون نېټه، د روغتیایي ازموینې وخت او د ستونزې په اړه لنډ یادښت.
د خپل روغتیایی پایلو ته د لاسرسي په یقیني کولو سره، تاسو کولی شئ د خپل ځان په اړه مهم روغتیایی معلومات ترلاسه کړئ، اړوندې اندېښنې ته رسېدنه وکړئ او د دوی د بیامېشتېدنې په بهیر کې د خپل روغتیایی معایناتو اسناد له ځان سره ولرئ.
که چېرې CARE ما د روغتیا ازموینې لپاره راجع کړي او زه د نري رنځ (TB) تشخیص شوی وم او بیا زه له هغه وروسته روغ شوک ، ایا زه اړتیا لرم چې بله روغتیایی معاینه ترسره کړم؟
نه! که ستاسو د نري رنځ (TB) د ازموینې پایله منفي وي، د نري رنځ له درملنې وروسته د بلې روغتیايي ازموینې ته اړتیا نشته. په عموم ډول، د TB ناروغان د خپل روغتیا د بېرته راګرځولو لپاره د درې میاشتو درملنې رژیم څخه تېرېږي. کله چې د نري رنځ ازموینې پایلې منفي حالت په ګوته کړي، نور طبي درملنې ته اړتیا نشته.
د TB درملنې بشپړولو او د منفي پایلې ترلاسه کولو وروسته، غوښتونکي باید انتظار وکړي چې د CARE لېږد الوتنې کې شامل شي. په هرصورت، که چېرې شپږ میاشتې پرته له بیامېشتېدنې څخه تېرېږي، د الوتنې لپاره د شرایطو برابرولو لپاره یو بل روغتیایي ازموینې ته اړتیا لیدل کېدی شي.
دا مهمه ده یادونه وکړو چې که څه هم د نري رنځ درملنه ممکن د CARE لېږد الوتنې کې د شاملولو لپاره کافي وي، نور روغتیایی شرایط یا عوامل هم په پام کې نیول کېدی شي. ستاسو د روغتیا وضعیت او د ځای پر ځای کولو پلانونو په اړه هر ډول تازه معلوماتو په اړه د CARE سره د دوامداره اړیکې سپارښتنه کېږي.
ما پنځه میاشتې دمخه خپل روغتیایی معاینه وکړل خو زه تر اوسه لېږدول شوی نه یم، زما دا د روغتیايي ازموینې پایلې څومره وخت اعتبار لري؟
ستاسو د روغتیایی ازموینو پایلې به د روغتیایی ازموینو بشپړولو وروسته د شپږو میاشتو مودې لپاره د اعتبار وړ وي. دا د روغتیا ارزونې لپاره د CARE لخوا معرفي کېدو وروسته، د پایلو اعتبار د شپږو میاشتو لپاره دی. د دې مودې په جریان کېCARE معمولاً درېیم هېواد ته د لېږد ترتیبات کوي. په هرصورت، که شپږ میاشتې پرته له الوتنې څخه تېرېږي، تاسو باید د CARE احتمالي الوتنې لپاره وړ پاتې کېدو لپاره یو بل روغتیایی ازموینه تر سره کړئ.
ډاډ ترلاسه کول چې ستاسو روغتیا ازموینه د اعتبار وړ ده د لېږد پروسې لپاره خورا مهم دي. که چېرې ازموینه مخکې له دې چې تاسو سفر وکړئ پای ته ورسېږي او تاسو پرته له دې چې نوې ازموینې ترسره کړئ، تاسو به د تګ لپاره د CARE الوتنې لېست څخه د ایستلو خطر سره مخ یاست. له همدې امله، دا مهمه ده چې ستاسو د روغتیا ازموینې د پای نېټې په اړه پوه شئ او د هر ډول تازه معلوماتو یا بیاځلي ازموینې په اړه د CARE سره همغږي وکړئ.
په داسې حال کې چې تاسو الوتنې ته په انتظار یاست، د CARE سره دوامداره اړیکه ساتل او په سمدستي توګه د روغتیايي ازموینې اړتیاوې په ګوته کول کولی شي د تخلیې پروسې په اغېزمنتیا کې مرسته وکړي.
زه باید څه وکړم که زما د قضیې اسناد نږدې 6 میاشتې دمخه د NVC سره بشپړ (Documentarily completed) شوي وي، خو CARE له ما سره د اسنادو غوښتنې لپاره اړیکه نه ده نیولې؟
که ستاسو د قضیې اسناد نږدې 6 میاشتې دمخه د NVC سره بشپړ (Documentarily completed) شوي وي او تاسو د CARE څخه ټلیفون نه دی ترلاسه کړی، یو څو شیان باید په پام کې ونیول شي. عموماً، CARE به له NVC سره د اسنادو له بشپړولو وروسته ډېر ژر ستاسو د معلوماتو او اسنادو راټولولو لپاره زنګ ووهي، معمولاً په لومړۍ میاشت کې. په هرصورت، که تاسو دمخه خپل پاسپورټ او نور اړین اسناد په مستقیم ډول CARE ته سپارلي وي، تاسو ممکن د لومړني تماس پرته په الوتنه کې شامل شئ.
دا ډېره مهمه ده ډاډ ترلاسه کړئ چې ستاسو اسناد په حقیقت کې CARE سره شتون لري او بیا صبر وکړئ. CARE به تاسو سره دویم ځل لپاره اړیکه ونیسي کله چې درېیم هېواد ته د تللو وخت وي. دا اړیکه مهمه ده ځکه چې دا تاسو ته درېیم هېواد ته د تللو او سفر کولو او همدارنګه د راتلونکو پړاوونو په تړاو لارښوونې کوي. په داسې حال کې چې لومړنۍ او دویمې اړیکې د اړیکو لپاره مهمې دي، کله چې CARE پرېکړه کوي څو تاسو ته الوتنه ورکړي، دا به تاسو سره د تماس لپاره لاره ومومي.
د هر ډول اندېښنو د حل کولو لپاره، تاسو کولی شئ په دوامداره توګه د اړیکې شمېرې یا واټساپ په کارولو له CARE سره اړیکه ونیسئ څو ستاسو د اسنادو حالت تایید کړي. د فعالې شمېرې درلودل او د اړیکو کرښې خلاص ساتل کولی شي ستاسو د قضیې د پرمختګ په اړه باور او وضاحت چمتو کړي.
لهNVC سره زما د قضیې د اسناد پشپړېدو (Documentarily completed) څخه یو کال نه هم ډېر وخت کېږي چې مرکې ته انتظار کوم، کله زه د CARE لخوا د لېږدولو تمه کولی شم؟
د CARE لخوا د ځای پر ځای کولو یا بیامېشتېدنې مهال وېش د پام وړ توپیر لري او وړاندوینه کول کېدی شي آسانه نه وي. د دې حقیقت سره، سره چې تاسو د قضیې د اسناد پشپړېدو (Documentarily completed) څخه یو کال نه هم ډېر وخت کېږي چې مرکې ته انتظار کوئ، ډېری فکټورونه د ځنډ سره مرسته کوي. په NVC او CARE کې د کار دروند بار د دې لامل شوی چې لوی شمېر غوښتونکي د اوږد انتظار وختونه تجربه کړي، ډېری وختونه په هرو دوو میاشتو کې یو آپډېت لېږل کېږي.
د بیامېشتېدنې پرېکړې د بېلابېل ناڅرګند لومړیتوبونو او فکټورونو پر بنسټ دي چې یوازې NVC او د بهرنیو چارو وزارت ته روښانه دي. په داسې حال کې چې الوتنې ته انتظار کول ناهیلي کوونکی دی، خو صبر او حوصلې ته اړتیا لري. دا مشوره ورکول کېږي چې د NVC یا CARE تازه معلوماتو لپاره خپل ټلیفون او برېښنالیک وڅارئ ځکه چې دوی به تاسو ته خبر درکړي کله چې تاسو د ځای پرځای کېدو او درېیم هېواد ته سفر پر شرایطو برابر شئ.
له بده مرغه، د لېږد پروسې پېچلتیا او د قضیو د شمېر د ډېروالي له امله، دقیق مهالوېش شتون نه لري. ستاسو د عمل غوره لاره دا ده چې صبر ولرئ او هوښیار واوسئ او د NVC یا CARE لپاره انتظار وکړئ څو تاسو سره د خپلې پرېکړې په اړه اړیکه ونیسي چې د احتمالي لېږد بهیر کې شامل شي.
ولې زه د CARE الوتنې او لېږد لپاره نږدې ۲۴ میاشتې انتظار کوم، خو زما الوتنه لاهم نه ده معلومه شوې؟
د غوښتنلیک ورکوونکو لپاره د الوتنې په ترتیباتو کې ځنډ چې نږدې ۲۴ میاشتې یا ډېر انتظار کوي بېلابېلو عواملو ته منسوب کېدی شي. ویلی شو چې د دې لپاره په سلهاوو لاملونه شته، خو دلته مو د ځینو احتمالي دلایلو یادونه کوو:
- د الوتنې لېست کول او د ځای پر ځای کولو پرېکړې د لومړیتوبونو او بېلابېلو او ناڅرګندو فکټورونو پر بنسټ دي چې یوازې NVC او د بهرنیو چارو وزارت ته روښانه دي.
- د CARE ټیم د ویزې ملي مرکز او د متحده ایالاتو د بهرنیو چارو وزارت لخوا ټاکل شوي لومړیتوب پر بنسټ درېیم هېوادونو ته غوښتونکي لېږدوي. غوښتونکي ممکن د لومړیتوب ورکولو پروسې پر بنسټ د CARE ټلیفون کولو پورې انتظار ته اړتیا ولري.
- ځینې غوښتونکي ممکن لاهم د CARE ټیم د اداري پروسې (Administrative process) لاندې وي چې دا به د ځای پر ځای کولو کې په برخه کې د ځنډ او انتظار لامل شي.
- د غوښتونکي د امنیتي شالید ارزونې د CIA، FBI، د کورني امنیت ډیپارتمنټ او د دفاع وزارت (DoD) په ګډون د متحده ایالاتو د بېلابېلو دولتي ادارو لخوا ترسره کېږي، چې هره اداره ځان ته اداري پروسې او سیسټمونه لري.
- احتمال شته چې NVC د هغو لوی شمېر غوښتونکو د قضیو بیاکتنه کوي چې د مرکې په مرحله کې دي، په ځانګړې توګه هغه څوک چې په ۲۰۲۲ کې د COM څخه تاییدي ترلاسه کړی او دې کار د CARE ځای په ځای کولو باندې اغیزه کړې.
- ان امکان لري چې تاسو به مرکې ته په تمه یاست، خو د بهرنیو چارو وزارت لاهم هڅه کوي پوه شي چې ایا ستاسو قضیه په رښتیا هم معتبر ده او که نه، او ایا ستاسو سپارل شوي اسناد د اعتبار وړ دي او که نه؛ ځکه چې NVC لا هم هڅه کوي هغه قضیې بېرته رد کړي کوم چې په افغانستان کې د امریکې ماموریت سره یې همکاري نه وي کړې او جعلي اسناد یې سپارلي وي.
- که یو غوښتونکی د CARE د ځای پرځای کولو وړاندیزونه له پامه غورځوي، د کورنۍ غړي یې پاسپورټ نلري، د کورنۍ غړي یې د ۲۱ کالو څخه پورته وي، یا د وړتیا نور معیارونه پوره نه کړي، د دوی ځای پر ځای کېدل ممکن وځنډول شي یا وړ ونه ګڼل شي.
- هغه غوښتونکي چې د امنیتي اندېښنو یا د قرارداد د فسخه کولو له ستونزو سره مخ شوي وي ممکن د ځای پر ځای کولو اړتیاو په بشپړولو کې ځنډ یا ناکامي تجربه کړي.
- دCARE ټیم ممکن د بېلابېلو دلایلو له مخې د ځینو ایالتونو په غوره کولو باندې محدودیتونه وضع کړي وي، کوم چې به د ځینو غوښتونکو د ځای پر ځای کولو پر پروسه اغېزه وکړي.
- غوښتونکی د مهمو لومړیتوبونو په کټګورۍ کې نه و شامل شوی، او لاهم یو شمېر غوښتونکي شتون لري چې لوړ لومړیتوب لري او لاهم خپلې الوتنې ته انتظار باسي، یا شاید د لومړیتوب نېټه (Priority date) په دې وروستیو کې وه.
- د متحده ایالاتو د بېلابېلو ویزو لرونکي ممکن د ځای پر ځای کولو پروسه کې له خنډونو یا ځنډونو سره مخ شي.
غوښتونکو لپاره چې د شاوخوا ۲۴ میاشتې انتظار کړی وي، دا مهمه ده چې د CARE سره د ټلیفون یا واټساپ له لارې اړیکه ونیسي او ځان ډاډه کړي چې پر شرایطو برابر دي. که وویل شول چې پر شرایطو برابر نه یاست، د ځای پر ځای کولو لپاره بدیل اختیارونه وپلټئ، لکه خپله قضیه بل هېواد لکه پاکستان ته ولېږدوئ. د اړوندو خیریه سازمانونو لکه "No One Left Behind" او AfghanEvac څخه د مرستې غوښتنه وکړئ ځکه دوی کولی شي په اغېزمنه توګه په بیامېشتولو پروسه کې له تاسو ملاتړ او مرسته وکړي.
شپږ میاشتې یا ډېر وخت کېږي چې ما د خپلو مدني اسنادو تصدیق (Civil document completion) ترلاسه کړی، خو ما د CARE څخه هېڅ تلیفون نه دی ترلاسه کړی چې ما درېیم هېواد ته انتقال کړي؛ ولې؟
د بیامېشتېدنې په بهیر کې دې پوښتنې ته کوم روښانه ځواب نشته. معمولاً، د ویزې ملي مرکز (NVC) څخه ستاسو د مدني سند بشپړولو تصدیق (Civil document completion) ترلاسه کولو وروسته، ستاسو د قضیې معلومات به د CARE ټیم ته واستول شي. یوځل چې ترلاسه شي،CARE معمولاً له اشخاصو سره اړیکه نیسي څو د اضافي اسنادو غوښتنه وکړي لکه پاسپورټونه او نکاح خط. که تاسو د NVC څخه د تایید ترلاسه کولو دمخه خپل اسناد CARE ته لېږلي، تاسو باید د تایید برېښنالیک ترلاسه کړی وي.
که ستاسو د مدني اسنادو تایید ترلاسه کولو وروسته څو میاشتې د CARE سره اړیکه پرته تېرېږي، یو موضوع شتون لري چې باید په پام کې ونیول شي. لومړی، که ستاسو اسناد CARE ته د رسېدو دمخه بشپړ شوي وي، CARE ممکن تاسو سره سمدلاسه اړیکه ونه نیسي.
په هرصورت، که تاسو د خپلو مدني اسنادو له تایید څخه درې میاشتې وروسته د CARE څخه هېڅ ټلیفون نه دی ترلاسه کړی، نو سپارښتنه کېږي چې تاسو مستقیم د ټلیفون یا واټساپ له لارې CARE سره اړیکه ونیسئ. دا ډاډ ورکوي چې ستاسو اسناد ترلاسه شوي او ستاسو قضیه پروسس کېږي. که CARE ستاسو اسناد نه وي ترلاسه کړي، تاسو باید د NVC سره اړیکه ونیسئ څو دوی سمدلاسه ستاسو د قضیې تایید او معلومات بیا وسپارل شي.
هغه اشخاص چې خپل اسناد یې سپارلي او تصویب یې ترلاسه کړی دی مشوره ورکول کېږي چې د CARE سره اړیکه ونیسي څو د خپلو قضیو وضعیت وګوري او ډاډ ترلاسه کړي چې ټول اړین اسناد سم دي.
د "وپوښتئ" له کارپوهانو څخه د مرستې غوښتنه
هغه افغانان چې ځانګړو معلوماتو ته اړتیا لري، د "وپوښتئ" د معلوماتو مرکز ستاسو په خدمت کې دی. تاسو کولی شئ په انلاین بڼه د معلوماتو ترلاسه کولو لپاره د وپوښتئ "وټساپ شمېرې"(93729807235+) ، فېسبوک مسېنجر (Facebook Messenger) یا د وېبپاڼې د مسېنجر له لارې زموږ کارپوهانو سره اړیکه ونیسئ!
نور معلومات
هغه کسان چې په ټوله نړۍ کې د افغانانو لپاره د کډوالۍ، بیامېشتېدنې، ښوونیزو او لوړې زده کړې د پروګرامونو او د نورو بېلابېلو فرصتونو په اړه د لا ډېرو معلوماتو په لټه کې دي، او همدارنګه په افغانستان کې له نړیوالو سازمانونو څخه د بشردوستانه خدمتونو د معلوماتو او دولتي ادارو څخه د مدني اسنادو د اخیستلو د پړاوونو د پوهېدو په لټه کې دي، د "وپوښتئ" وېبپاڼې او ټولنیزو رسنیو ته مراجعه وکړي:
✓ د وپوښتئ وېبپاڼه (www.beporsed.org)